Sa southern part ng Cebu, Philippines, matatagpuan ang maliit na coastal town ng Oslob, na kilala sa buong mundo bilang isa sa mga lugar kung saan maaaring makita nang malapitan ang whale shark, ang pinakamalaking isda sa karagatan. Sa kabila ng laki nito, kilala ang whale shark bilang isang gentle giant. Maamo, tahimik, at hindi mapanganib sa tao.
Para maranasan ang natatanging tagpong ito, kinailangan ng maagang pag-alis mula sa Cebu City. Bago pa sumikat ang araw, nagsimula ang biyahe na tumagal ng humigit-kumulang tatlong oras. Tahimik ang paligid pagdating sa Oslob, may halong antok, excitement, at kaba habang hinihintay ang oras ng pagbaba sa dagat.
Ang whale shark ay maaaring umabot ng higit 10 metro ang haba, ngunit sa aktwal na pagkikita, mas nangingibabaw ang pakiramdam ng kapayapaan kaysa takot. Mabagal ang galaw nito, at ang mga puting tuldok sa katawan ay parang obra ng kalikasan. Sa Oslob, binibigyan ang mga bisita ng humigit-kumulang 30 minutong oras para makalangoy at makamasid kasama ang whale shark.
Maikli man ang oras, ang 30 minutong iyon ay naging isa sa pinaka-hindi malilimutang karanasan sa aking mga paglalakbay isang sandaling nag-iwan ng malalim na impresyon at tahimik na paghanga sa ganda at hiwaga ng dagat.
Gayunpaman, kasabay ng kasikatan ng Oslob whale shark tourism ay ang mga usaping may kinalaman sa pangangalaga sa kalikasan. May mga patakaran na ipinatutupad tulad ng pagbabawal sa paghawak sa whale shark, pagpapanatili ng tamang distansya, at limitadong bilang ng mga taong pinapayagang pumasok sa tubig. Layunin ng mga patakarang ito na mabalanse ang turismo at ang proteksyon ng mga hayop.
Ang karanasan sa Oslob ay hindi lamang tungkol sa pagkuha ng litrato o video. Isa itong paalala na bilang mga manlalakbay, may responsibilidad tayong igalang ang kalikasan. Ang tunay na halaga ng paglalakbay ay hindi lang nasusukat sa lapit ng karanasan, kundi sa pag-unawa at paggalang sa buhay na ating nasasaksihan.
배소영 명예기자(필리핀)
중도일보(www.joongdo.co.kr), 무단전재 및 수집, 재배포 금지
댓글 0개